Sporepeter - e Fasnachts-Gschicht

Unseri Glygge

Am e Mitarbeiter-Fescht uff em Rhy im Summer 1972 hän sich e baar Pfyffer und Dambuure fir e Ständeli zämme do und derno feschtgstellt, dass kaine in ere Clique isch. Me hett beschlosse, in Zuekunft zämme Fasnacht z mache. Zer glyche Zyt hett d Dambuure-Gruppe vo de Alte Lälli Pfyffer gsuecht und eso hett me sich zämme do und als Alti Lälli Fasnacht gmacht.

Do dr Altersunterschiid zwische Pfyffer und Dambuure sehr gross gsi isch (d Pfyffer in de 30, d Dambuure eher gege 70 Joor) isch das nid lang guet gange. D Dambuure hän nur am Morgestraich und am Obe drummlet, d Pfyffer sin am Nomidaag elai uff d Gass.

Im Restaurant Glogge, s Clique-Lokal vo de Alte Lälli, wo au Jazz-Konzärt stattgfunde hän, isch es z luut worde und 1975 hett me mit dr Urbanstube e neu Clique-Lokal gfunde. Das hett aber de ganz Alte Lälli Dambuure nid passt und es isch zum Bruch ko. Nur 2 Dambuure sin bliibe. Die Alte Lälli hän aber nimm erlaubt, dä Name z traage und die verbliibende Clique-Mitgliider hän miesse e neue Name sueche.

Historisches Bild 1

So hets wohrschynlig ussgseh. E Stammbaum - historisch aber nit veryfiziert.

Am Zyschtig, 9. Dezämber 1975

hett me in dr Urbanstube d «Gässli-Wäntele» gründet. Bi dr Amäldig bim Comité isch aber feschtgstellt worde, dass es dä Name scho git und eso hett me nonemool miesse e neue Name finde: Sporepeter.

Historisches Bild 1

S erschd Signet. Ganz spontan. Und irgendwie aigewillig....

Historisches Bild 1

Name–Yweijg vo de «Gässli-Wäntele» am 9. vom Wiehnachtsmonet 1975.

Gründigsmitgliider: Rolli S., Paul W., Trudi D., Rolf S., Werner S., Claire A., Margrit G., Marcel Z., Linda S., Claude W. - - Nid unterschriibe, aber derby gsi sind dr Alfi S., dr Bebbo, Peter V. und no e paar meh.

1976, an dr erschte Fasnacht

als Sporepeter sin 12 Pfyffer, 3 Dambuure, 1 Tambourmajor und e paar Vorträäbler mitgloffe. Fir e Sujet hett d Zyt nimm glängt, aber alli hän e scheens Alti Dante Kostüm gha. Als Kopfladärnli hän Nachttisch-Lampeschirmli dient, e Ladärne hetts noni geh.

Historisches Bild 1

D Sporepeter am St. Johanns-Ryywääg in Originalbsetzig.

Unterem Joor hetts divärsi Aktivitäte geh, z.B. Wettfische, Velo-Ussfahrte, Waldwiehnachte.

überhaupt isch vo Aafang aa s Glygge-Läbe, s Gmietligge aber au s Musikalische im Vordergrund gstande. D Sporepeter sin als gmischti Dambuure und Pfyffer-Gruppe bim Comité gmäldet worde und eso sells au in Zuekunft bliibe.

Es hett immer emool Usstritt geh, aber au immer wiider neui Mitgliider, au ganzi Gruppe wo zu de Sporepeter ko sin. Eso isch es guet glunge, d Sporepeter Glygge über all die Joor wytter z fiehre.

Historisches Bild 1

E neue Sporepeter - aapasst an die neue Medie. Me goot nämli mit de Zyt.

Im 2025 isch unser 50-Joor-Jubiläum

und es isch unser Zyyl, au wytterhin als Sporepeter an dr Fasnacht mit z mache.

Fäält ebbis? Weisch mee?

Denn mälds em Webmaischter. Härzlige Dangg.

********


Demnäggscht

1. Summerplausch

Dienstag, 09. Juli 2024
Wo: gem. Ylaadig


2. Summerplausch

Dienstag, 23. Juli 2024
Wo: gem. Ylaadig


3. Summerplausch

Dienstag, 06. August 2024
Wo: gem. Ylaadig


Proob

Dienstag, 03. September 2024
19:30 Uhr
Wo: Uelikäller (Pfyffer) / Holzschopf (Dambuure)